Լրահոս / Հայտարարություններ
Դիվանագիտական դպրոցի 2016-17 թթ. ունկնդիրների ուսումնական այցը Էստոնիա
31.10.2017
Հոկտեմբերի 23-ից 27-ը տեղի ունեցավ Դիվանագիտական դպրոցի ունկնդիրների ուսումնական այցը Էստոնիա: Ունկնդիրները Տալլինում հանդիպումներ ունեցան Էստոնիայի արտաքին գործերի նախարարությունում, կառավարությունում, խորհրդարանում, նախագահի նստավայրում և մի շարք ոչ պետական կառույցներում, ինչպես նաև այցելեցին Տարտու։
Այցը մեկնարկեց հոկտեմբերի 23-ին Էստոնիայի տեղեկատվական տեխնոլոգիաների կենտրոնում, որտեղ ունկնդիրները ծանոթացան էլեկտրոնային կառավարման էստոնական փորձին։ Նույն օրը ունկնդիրները Էստոնիայի դիվանագիտական դպրոցում հանդիպում ունեցան Էստոնիայի դիվանագիտական դպրոցի տնօրեն Էկե Նոմի և դպրոցի անձնակազմի հետ։
Հոկտեմբերի 24-ից 26-ը ունկնդիրները հանդիպումներ ունեցան Էստոնիայի ԱԳՆ-ում, կառավարությունում, խորհրդարանում, ինչպես նաև նախագահի նստավայրում։ Ունկնդիրների համար դասախոսություններով հանդես եկան մի շարք բարձրաստիճան պաշտոնյաներ, որոնց թվում էին Էստոնիայի նախկին արտգործնախարար Մարինա Կալյուրանդը, նախկին արտգործնախարար և ներկայում Բալթիկ ծովի շրջանի գծով Էստոնիայի նախագահի հատուկ հանձնարարություններով դեսպան Ռաուլ Մալկը, Ռուսաստանում և Նորվեգիայում նախկին դեսպան Սիմու Տիկը, պատգամավոր, Հայասատան Էստոնիա խորհրդարանական խմբի անդամ Կալե Պալինգը, նախագահի անվտանգության հարցերով խորհրդական Պետր Կուիմեթը։
Դասախոսությունների ընթացքում ունկնդիրները ծանոթացան Էստոնիայի արտաքին քաղաքականության մարտահրավերներին և առաջնահերթություններին, հայ-էստոնական հարաբերություններին, ԵՄ Խորհրդում Էստոնիայի նախագահության շրջանակներում իրականացվող ծրագրերին, ազգային անվտանգության համատեքստում տեղեկատվական տեխնոլոգիաների կարևորությանը և այլ թեմաների։ Հոկտեմբերի 25-ին ունկնդիրները նաև հնարավորություն ունեցան հանդիպելու Մերձբալթյան երեք հանրապետություններում (նստավայրը Վիլնյուս) ՀՀ դեսպան Տիգրան Մկրտչյանի հետ, որը մանրամասն ներկայացրեց հայ-էստոնական հարաբերությունները։
Բացի պաշտոնական այցերից, ունկնդիրները Տալլինում հնարավորություն ունեցան այցելելու պատմամշակութային նշանակություն ունեցող տարբեր հաստատություններ և գիտահետազոտական կենտրոններ։
Այցի վերջին օրը ունկնդիրները այցելեցին Տարտու և հյուրընկալվեցին Տարտուի համալսարանում, որտեղ ճանաչողական շրջայցից հետո հանդիպումներ ունեցան համալսարանի դասախոսական կազմի հետ։ Տարտուում ունկնդիրները նաև հնարավորություն ունեցան այցելել Էստոնիայի ազգային թանգարան։
Այցը կազմակերպվել էր Հայաստանի և Էստոնիայի դիվանագիտական դպրոցների համագործակցության շրջանակներում։